平時煮意粉，一定要先煮滾水，再放意大利粉，用沸水煮才會快熟及不會黐在一起，但一定要不停攪拌，要不然意大利粉會很易黐煲底，洗也洗死你。如果不想起勢攪無時停，其實也有辦法，就是加入牛油或橄欖油，一開始只要攪拌幾下就可以由得它自己煮，有油份令其不黐底，完全不用睇火也可以。煮意粉要下鹽，除了令意粉入味外，鹽份亦可以令水的沸點更高，意粉會更易熟和不易腍。而意粉熟後通常會回鑊連醬汁同煮，所以烚意粉時間要比包裝指示少1至2分鐘，剪開 麪條見到有小白點便可。緊記以上幾點，煮意粉唔黐底話咁易！

剛剛學做蛋糕時，可能很多人也試過立亂用麪粉，明明想做鬆軟的蛋糕，焗出來嘅就似方包。點解？原來無睇麪粉嘅筋性，用咗高筋麪粉嚟焗蛋糕！一般嚟講，麪粉分低中高筋麪粉，筋性其實係蛋白質含量，蛋白質越高，筋性就越高，做出嚟嘅糕點各有特色！除了低中高外，想做油炸鬼就要用多於 13.5%蛋白質嘅重筋粉！

低筋　蛋糕
蛋白質含量為為 7-9%（即每 100克麪粉含蛋白量），適合用嚟做蛋糕、馬拉糕等鬆軟食品。

中筋　饅頭
蛋白質有 9-12%，筋度及黏度較均衡，適合製造饅頭、燒餅等。

高筋　麪包
12.5至 13.5%嘅蛋白含量，適合做麪包、鬆餅等吃起來帶口感的食物。


Source: http://hk.apple.nextmedia.com/template/apple_sub/art_main.php?iss_id=20111115&sec_id=12187363&subsec_id=38328&art_id=15800780

點解快餐店啲薯條可以咁脆，自己炸嘅薯條就軟腍腍好頹咁呢？全因薯條充滿澱粉質，直接炸就會腍身唔夠脆，點好？有廚師教路，粗薯條要先汆水，幼薯條則啤啤水，目的就係要除去薯條表面嘅澱粉質，再放雪櫃雪一陣等佢收乾水份，然後炸至金黃色，撈起攤凍 5秒再炸一炸，咁就可以炸出脆薯條嘞！


粗身薯條先汆水，去除薯仔嘅澱粉質！

幼身薯條則以啤水代替汆水，便可去除薯仔澱粉。

汆水或啤水後嘅薯條要放雪櫃，等佢收乾水份！

放滾油炸至金黃，盛起攤 5秒再炸。


Source: http://hk.apple.nextmedia.com/template/apple_sub/art_main.php?iss_id=20111114&sec_id=12187363&subsec_id=38328&art_id=15797231